საქართველოს ICT კლასტერი საერთაშორისო პროექტების მოზიდვისთვის მუშაობს
ICT კლასტერი ამჟამად საქართველოში მოქმედ 11 კომპანიას აერთიანებს. კლასტერი ტექნოლოგიური ინდუსტრიის ე.წ. სთეიქ ჰოლდერების თანამშრომლობის პლატფორმას წარმოადგენს, რომელიც საქართველოს ICT( information communication technologies) ბიზნესის გაძლიერების მიზნით შეიქმნა. ICT კლასტერი 3 ძირითადი მიმართულებით მუშაობს: ბიზნესის განვითარება და ექსპორტი, რეგულასციების და პოლიტიკის შემუშავება და მესამე- ციფრული ტექნოლოგიების სფეროში განათლების ხელშეწყობა. კლასტერს ჰყავს მმართველი საბჭო, რომელიც წევრი კომპანიების წარმომადგენლებისგან შედგება.
მარიამ სუმბაძე(ICT კლასტერის დირექტორი): „ICT კლასტერი საქართველოში დაახლოებით ერთი წლის წინ ჩამოყალიბდა და სულ ახლახანს დავიწყეთ აქტიური მუშაობა. შესაბამისად, დიდი ხნის ისტორია ჯერ არ გვაქვს. რამდენიმე უცხოურ კლასტერთან, მათ შორის ესტონურ და ჩეხურ კლასტერებთან ვთანამშრომლობთ. ვცდილობთ, ურთიერთობა უფრო მჭიდრო გავხადოთ და ერთობლივ პროექტებზე შევთანხმდეთ. ამ ქვეყნებთან გვაქვს სასწავლო გაცვლითი ვიზიტები, რის ფარგლებშიც ვამყარებთ ახალ კონტაქტებს, იმისთვის, რომ ჩვენმა კომპანიებმა ევროპულ ბაზარზე ინტეგრაცია მარტივად მოახერხონ. ესტონეთში და ჩეხეთში საკმაოდ დიდი კლასტერები არიან და თავიანთ ქვეყნებში აისიტი სფეროში მნიშვნელოვან ძვრებს ახორციელებენ. ვცდილობთ, ეს პრაქტიკა ჩვენთანაც დავნერგოთ. კლასტერი ექსპორტის მიმართულებით აქტიურად მუშაობს და ვიმედოვნებთ, მნიშვნელოვან საერთაშორისო პროექტებს მალე ვიხილავთ. სამწუხაროდ, ამ საქმეში კოვიდ19-ის ეპიდემიის გამო შექმნილმა ვითარებამ ხელი შეგვიშალა. იმედი გვაქვს, ერთობლივ პროექტს უახლოეს მომავალში დავიწყებთ. ვცდილობთ, ახალი კონტაქტები სხვა ქვეყნებთანაც დავამყაროთ, იმისთვის, რომ საქართველო გაჩნდეს რუკაზე, როგორც წარმატებული ქვეყანა აიტი მიმართულებით.
-შეგიძლიათ გვითხრათ, კონკრეტულად რა სარგებელი მოუტანა ICT კომპანიებს კლასტერში გაერთიანებამ?
-მთავარი ბენეფიტი, რაც კლასტერში გაერთიანებას მოაქვს, არის თანამშრომლობა და ღია პარტნიორობა. კლასტერში რამდენიმე ისეთი კომპანიაა გაერთიანებული, რომლებიც ამ სფეროში ერთმანეთისთვის კონკურენტები არიან, თუმცა, გაერთიანების შიგნით ერთად მუშაობენ. მათ კლასტერის ფარგლებში სხვადასხვა პროექტის კონცეპტზე დაიწყეს თანამშრომლობა და კლიენტებთან ერთობლივად მუშაობენ. მაგალითად, ერთ კომპანიას აქვს Hardware devices, მეორეს -Soft და პროგრამების განვითარების გამოცდილება და მათ შორის ხდება თანამშრომლობა და შესაძლებლობების შეჯერება. ამჟამად კომპანიები ძალიან აქტიურად მუშაობენ და ხდება კომპეტენციების გაერთიანება, რომ შეიქმნას Remote working tools კომპანიებისთვის. ვცდილობთ, კომპანიებს კოვიდ19-ის პანდემიის პირობებში დისტანციურ მუშაობაზე გადასვლა გაუმარტივდეთ. ამ სქემაში კლასტერის 6-7 კომპანიაა ჩართული. შექმნილ პირობებში გაჩნდა მოთხოვნა მაღალ ტექნოლოგიებზე და ტექნიკურ უზრუნველყოფაზე. კომპანიაში თანამედროვე ტექნოლოგიების და სისტემების საჭიროება ყველამ დაინახა. ჩვენი კლასტერის კომპანიები უკვე მუშაობენ სტრატეგიაზე, რათა დავეხმაროთ ბიზნესებს, რომ სამომავლოდ უფრო ეფექტიური სისტემები დანერგონ. თუმცა, გამოწვევა ის არის, რომ ეკონომიკა გაჩერებულია, შემოსავლები შემცირებული, ამიტომ კომპანიებს ახალი პროექტების დაკვეთა უჭირთ.
ვფიქრობ, ციფრული ტრანსფორმაციის მნიშვნელობა თითოეული კომპანიისთვის სამომავლოდ უფრო ნათელი გახდება. მნიშვნელოვანია, კლასტერის უპირატესობების კომპანიებთან მიტანა. ერთობლივი პროექტების განსახორციელებლად, კლასტერში რაც უფრო მეტი მათგანი ჩაერთვება, მით მეტი შესაძლებლობები გაჩნდება. კლასტერში გაერთიანება განსაკუთრებით მნიშვნელოვანია მცირე და საშუალო კომპანიებისთვის, რადგან მაღალი კონკურენციის პირობებში სხვადასხვა სირთულეებთან გამკლავება მათთვის არ არის მარტივი.
გარდა ამისა, კლასტერი წევრ კომპანიებს უფრო ფართო წვდომას და ასპარეზს აძლევს, იმისთვის, რომ საჭიროებების შესახებ ერთიანი ხედვა დააფიქსირონ, ხმამაღლა ისაუბრონ, როგორც პოლიტიკის, ასევე ბიზნესის საკითხებზე.
-კლასტერში გაერთიანება ბიზნესებს ხარჯების დაზოგვის საშუალებას აძლევს. ეს ფაქტორი ICT კლასტერის შემთხვევაში რამდენად მუშაობს?
- ICT კომპანიების შემთხვევაში მნიშვნელობა არ აქვს გეოგრაფიულ სიახლოვეს. საკითხები იოლად წყდება, რადგან ონლაინ კომუნიკაციას მარტივად ვახორციელებთ. ICT კლასტერის თვითოეული წევრი კომპანია ტექნოლოგიურად კარგად არის აღჭურვილი და შესაბამისი მექანიზმების გამოყენების ცოდნა გააჩნია. რეგულარულად ტარდება შეხვედრები და კლასტერის წევრები მსჯელობენ, როგორც უშუალოდ მათი ბიზნესისთვის მნიშვნელოვან საკითხებზე, ისე საზოგადო სარგებლის შესახებ. ბიზნეს შესაძლებლობებში ერთობლივად ჩართვა, ICT სფეროსთვის ცვლილებების განხორციელება და ერთობლივი პროექტების ექსპორტზე გატანა, რაც ცალკეული კომპანიისთვის შესაძლოა რთული იყოს, კლასტერისთვის ხელმისაწვდომია. კლასტერში გაერთიანების სურვილი სხვადასხვა მცირე და საშუალო ზომის კომპანიებს მუდმივად აქვთ, შესაბამისად მიმდინარეობს მოლაპარაკებები.
-ICT კლასტერი ქვეყანაში არსებულ სხვა კლასტერებთან თუ თანამშრომლობს?
-დონორი ორგანიზაციები უზრუნველყოფენ ჩვენ შეხვედრებს. გვაქვს კომუნიკაცია რამდენიმე კალსტერთან, მათ შორის, ავეჯის კლასტერთან, ბიზნესს ასოციაციასთან და ა.შ რაც ყველაზე მნიშვნელოვანია, აისიტი არის გამჭოლი მიმართულება ნებისმიერი სექტორისთვის. თითოეული კლასტერი, რაც დღისათვის საქართველოში არსებობს, ტექნოლოგიურ გადაწყვეტებს საჭიროებს. ეპიდემიის პირობებში განვაახლეთ კომუნიკაცია, რომ მათ შექმნილ რთულ მდგომარეობაში დავეხმაროთ. ტექნოლოგიები გვაძლევს საშუალებას, რომ საინტერესო გადაწყვეტები მოვიფიქროთ, რადგან თითოეულ მათგანს ამ სიტუაციაში თავისი სპეციფიკური გამოწვევა აქვს.
ICT სექტორს საქართველოში ძალიან დიდი პოტენციალი აქვს. გვყავს მაღალი დონის სპეციალისტები, ვისაც შეუძლია საქართველო ICT რუკაზე მონიშნოს. არიან სპეციალისტები, ვისაც უცხოეთში აქვთ განათლება მიღებული. მათ ხშირად აქვთ დაკვეთები უცხოეთიდან, რაც საშუალებას აძლევთ, ფეხი აუწყონ სწრაფად ცვალებად ტექნოლოგიებს. თუმცა ჩვენი მიზანია, მაქსიმალურად შევანელოთ წარმატებული კადრების გადინება ქვეყნიდან, რათა მათ მაღალი ხარისხის პროდუქტი ქვეყნის შიგნით შექმნან. ამისთვის კი საჭიროა ძლიერი და წარმატებული აიტი კომპანიები.
-რა სამომავლო გეგმები გაქვთ. რის გაკეთებას აპირებს ICT კლასტერი?
-კლასტერის ერთ- ერთი მთავარი მიზანია ექსპორტზე გავიტანოთ ჩვენი კომპანიების ცოდნა და კომპეტენცია და ამით ქვეყნის ეკონომიკის ზრდას შევუწყოთ ხელი. ასევე, აქტიურად ვაგრძელებთ მუშაობას საგანმანათლებლო მიმართულებით, რადგან ვფიქრობთ, რომ სწორედ ცოდნაზე დაფუძნებული ეკონომიკის მშენებლობა არის ჩვენი ერთ- ერთი ძირითადი გამოწვევა. აისიტი სექტორში არსებობს კადრების მუდმივი დეფიციტი, სწორედ ამ მიმართულებით მუშაობს კლასტერი აქტიურად. ჩვენ ვაკეთებთ საკადრო ბაზრის ანალიზს, ბიზნეს საჭიროებებიდან გამომდინარე და ამის შემდგომ იგეგმება ესა თუ ის საგანმანათლებლო პროგრამები. ამ ეტაპისთვის რამდენიმე პროექტი გვაქვს, რომელთა დაფინანსების თაობაზე დონორ ორგანიზაციებთან ვაწარმოებთ მოლაპარაკებებს. შექმნილი სიტუაციიდან გამომდინარე, რთულია კონკრეტული ვადის დასახლება, მაგრამ, შემოდგომისთვის, სავარაუდოდ, ამ პროექტების განხორციელებას მოვახერხებთ. დაინტერესებულ პირებს ჩვენი კლასტერის შესახებ ინფორმაციის მიღება შეუძლიათ ჩვენი ვებ-გვერდის მეშვეობით https://ictcluster.ge/en/. ასევე, შეუძლიათ დაგვიკავშირდნენ ელექტრონული ფოსტის მისამართზე info@ictcluster.ge.
კლასტერისთვის ასევე მნიშვნელოვანია, მთავრობასთან თანამშრომლობა და საჯარო სექტორში ელექტრონული სერვისების დეცენტრალიზაციის და კონკურენტული ეკოსისტემის შექმნის დაჩქარება. ძალიან დიდი სურვილი გვაქვს, მთავრობასთან ელექტრონული მმართველობის დანერგვის და განვითარების სამუშაოებში ჩავერთოთ, მივცეთ რეკომენდაციები, როგორ მოხდეს ხარჯების ოპტიმიზაცია, ეფექტურობის ზრდა და ა.შ. მზად ვართ, რომ მოვახდინოთ სხვადასხვა სამთავრობო პროგრამის განვითარება, იმისთვის, რომ თითოეული დახარჯული თეთრი ეფექტიანი იყოს და ქვეყნის მოქალაქეებმა მიიღონ მაქსიმალურად მოქნილი და მრავალფეროვანი ელექტრონული სერვისები. ჩვენი კლასტერის წევრებს ასეთი თანამშრომლობის დიდი სურვილი აქვთ, თუმცა, პარტნიორობა ჯერჯერობით არ შემდგარა.
-რატომ? მთავრობა თქვენი შეთავაზებით არ დაინტერესდა?
-ამ ეტაპისთვის მთავრობას შევთავაზეთ რამდენიმეპუნქტიანი სამოქმედო გეგმა, რომელიც იქნება პასუხი, როგორც Covid-19 ის გამოწვევებზე, ისე ციფრული ტრანსფორმაციის მიმართულებით უფრო მჭიდრო და აქტიური თანამშრომლობისათვის. ვიმედოვნებთ, რომ ჩვენ შორის თანამშრომლობა შედგება.
სტატიის ავტორი: ნონა ქვლივიძე
სტატია მომზადებულია ლიეტუვას საგარეო საქმეთა სამინისტროს და „თანამშრომლობის განვითარების და დემოკრატიის ხელშეწყობის ფონდის" ფინანსური მხარდაჭერით.
