სახელმწიფო ქონების პრივატიზებასთან დაკავშირებული პრობლემები მეწარმეებს განვითარების საშუალებას არ აძლევს
"იძულებულები ვართ რომ თანამედროვე ფერმის გაკეთებისგან ჯერჯერობით თავი შევიკავოთ და საქონლის გამოსაკვებად ჩვენს სადემონსტრაციო ნაკვეთებში ევროპული ტექნოლოგიით ნაწარმოები საუკეთესო ქერი ნაკვეთიდანვე გავყიდოთ“
მეწარმე დავით კომლაძე უკვე რამდენიმე თვეა იძულებულია, რომ სახელმწიფოს ყოველთვიურად 525 ლარით მეტი გადასახადი გადაუხადოს. ის შპს „მ. ბლოკ კომპანია“-ს ფლობს და სამშენობლო მასალების საწარმო აქვს. კომლაძემ ზედმეტ გადასახადთან დაკავშირებით სსიპ სახელმწიფო ქონების ეროვნულ სააგენტოს წერილობით რამდენჯერმე მიმართა, თუმცა მისი პრობლების გადაჭრა საჯარო მოხელეებმა ვერ შეძლეს.
„ელექტრონულ აუქციონში გავიმარჯვე და 2014 წლის 30 დეკემბერს სახელმწიფო ქონების ეროვნულ სააგენტოსთან გავაფორმე ხელშეკრულება, რომლის თანახმადაც სახელმწიფოსგან 5 წლიანი ვადით იჯარით გადმომეცა 2200 კმ.მ მიწის ნაკვეთი ყოველთვიური 1650 ლარის ოდენობის გადასახადის სანაცვლოდ. მალე ჩემს მიერ იჯარით აღებულ მიწის ნაკვეთზე სახელმწიფომ გაიყვანა გზა, რასაც 700 კმ.მ მიწა დასჭირდა. ამის შემდეგ მე ფაქტობრივ მფლობელობაში დამრჩა 1500 კმ.მ მიწის ნაკვეთი. ამის გამო წერილობით მივმართე სახელმწიფო ქონების ეროვნულ სააგენტოს, რომ ან მოეცათ ჩემთვის სრულად ხელშეკრულების შესაბამისად 2200 კმ.მ მიწა ან მათ მიერ ჩამორთმეული 700 კვ. მ მიწის პროპორციულად შეემცირებინათ ჩემთვის იჯარის გადასახადი. წერილი ორჯერ შვიტანე ამ მოთხოვნით 2015 წლის 6 იანვარსა და 11 თებერვალს. მათგან მივიღე ძალიან არაკომპეტენტური პასუხი, რომ სააგენტომ მიზაშეუწონლად მიიჩნია ჩემი მოთხოვნის დაკმაყოფილება“, - აცხადებს დავით კომლაძე.
გურამ ჯინჭველაძე შპს „სასოფლო-საკონსულტაციო სამსახური“- ს დირექტორია. როგორც ის ამბობს, 420 ლარი ელექტრონულ აუქციონში მონაწილეობის შემდეგ მხოლოდ იმიტომ დაკარგა, რომ სახელმწიფო ქონების ეროვნულ სააგენტოს მიერ აუქციონის პირობები შეცდომით გამოქვეყნდა.
„ახალციხის მუნიციპალიტეტის ქალაქ ვალეში, კონკრეტულად კი სოფელი მაზანაში იჯარით გვინდოდა 55 751 კვ.მ. საკარტოფილე მიწის აღება. 2015 წლის 26 იანვარს აუციონში მივიღეთ მონაწილეობა და გავიმარჯვეთ. საიჯარო თანხა დაფიქსირდა 9905 ლარი. აუქციონის შემდეგ ხელშეკრულების დასადებად მისულს განმიცხადეს, რომ 9905 ლარი ყოველწლიური გადასახადი იყო. არადა უქციონის დოკუმენტაციაში მითითებული არ ყოფილა 9905 ლარი ყოველთვიურ, ყოველწლიურ თუ მთლიანი იჯარის ვადის ანუ 5 წლის გადასახადს წარმოადგენდა. ეს 5 ჰექტარი მიწა არ ირწყვება, ამას გარდა დიდი ხნის დაუმუშავებელია. სწორედ ამიტომ მისი ღირებულება დაბალია. კერძო პირები ასეთ ნაკვეთებს 1 ჰექტარს წელიწადში 300 ლარად აქირავებენ. მიმდებარედ ნაკვეთები რომელიც ირწყვება, 500 ლარი ღირს. აღმოჩნდა, რომ სახელმწიფო ნაკვეთებში საშუალოდ ხუთჯერ მეტ თანხას ითხოვდა. არადა აუქციონის ყველა მონაწილე ვფიქრობდით, რომ საბოლოოდ დასახელებული თანხა მთლიანი 5 წლის გადასახადი იყო. მე მოვითხოვე, რომ ნაკვეთი 5 წლის ვადით გადმოეცათ ჯამში 9905 ლარად ან დაებრუნებინათ ჩემთვის საგარანტიო თანხა 419 ლარი, რომელიც შეტანილი მქონდა აუქციონში მონაწილეობისთვის. სახელმწიფო ქონების მართვის ეროვნულმა სააგენტომ არ დააკმაყოფილა ჩემი მოთხოვნა და არაპროფესიონალი საჯარო მოხელეების გამო საგარანტიო თანხა დავკარგე“, - ამბობს ჯინჭველაძე.
მიწის საკითხზე სახელმწიფოსთან მორიგება ვერც კოოპერატივმა „წიქარა“-მ შეძლო. კოოპერატივის წევრი როინ ფსუტური ამბობს, რომ სახელმწიფო მიწებს ძალიან ძვირად აფასებს. ფსუტური და კოოპერატივის სხვა წევრები სოფელ შავშვებში მიწის შეყიდვის შემდეგ მარცვლეულის საწყობების მოწყობას აპირებდნენ. „ჩვენთვის საინტერესო მიწა არის სოფელ შავშვებში, 3 ჰექტარი შეფასებულია 120 ათას ლარად. ეს მარცვლეულის საწყობების ტერიტორიაა. შენობა- ნაგებობები შემორჩენილია ნანგრევების სახით. 120 ათას ლარად საუკეთესო 100 ჰექტარ სახნავ-სათეს ნაკვეთს ვყიდულობ და ნამდვილად ზედმეტია სახელმწიფოს კუთვნილ 3 ჰექტარში 120 ათასი ლარის გადახდა. ჩვენ პოლონელი და ინგლისელი ექსპერტები ჯიშიანი საქონლის შემოყვანას გვთავაზობენ. ბაზარზე ჯიშიანი ძროხები საშუალოდ 4500 ლარი ღირს და ამ ექსპერტების დახმარებით 2000 ლარამდე გვიჯდება ძროხების ჩამოყვანა. ამ ეტაპზე არ გვაქვს მარცვლეულის შესანახი და ამიტომ იძულებულები ვართ რომ თანამედროვე ფერმის გაკეთებისგან ჯერჯერობით თავი შევიკავოთ და საქონლის გამოსაკვებად ჩვენს სადემონსტრაციო ნაკვეთებში ევროპული ტექნოლოგიით ნაწარმოების საუკეთესო ქერი ნაკვეთიდანვე გავყიდოთ“, - ამბობს როინ ფსუტური
სახელმწიფო მიწასთან დაკავშირიებით პრობლება www.eugeorgia.info-ს კიდევ ერთ რესპოდენტს შეექმნა, რომელმაც ვინაობის გამხელა არ ისურვა:
„შეღავათიანი აგროკრედიტის პროექტი“-ს ფარგლებში გადამამუშვაებელი საწამოს მოწყობას ვგეგმავ. ჩემი ბიზნესგეგმა ფინანსისტებთან ერთად დავამუშავე. ჩემი შემოსავლებიდან გამომდინარე ბანკიც თანახმაა, რომ აგროკრედიტი მომცეს. აღმოჩნდა, რომ „შეღავათიანი აგრო კრედიტი“-ს პროექტის ფარგლებში მიწის შეძენა არ ფინანსდება. ამის გამო მე მომიწევს დამატებით ინვესტიციების მოძიება მიწის საყიდლად ან იჯარით ასაღებად. ამ მიმართულებით კიდევ ორი პრობლემა წარმოიქმნა. პირველი - სახელმწიფო საკუთრებაში არსებული მიწების გასხვისება შეჩერებულია და მეორე პრობლემა კი ის არის რომ სახელმწიფო მიწებს გრძელვადიანი იჯარით არ გასცემს. მე რომ გავრისკო და სახელმწიფოსგან იჯარით გადმოცემულ მიწაზე საწარმო ავაშენო, არ მაქვს იმის გარანტია, რომ ერთ დღესაც სახელმწიფო თავისი პრიორიტეტებიდან გამომდინარე მის კუთვნილ ტერიტორიას არ დამატოვებინებს. ამ შემთხვევაში ამდენი ნაშრომი წყალი ჩამეყრება“.
www.eugeorgia.info სსიპ სახელმწიფო ქონების ეროვნული სააგენტოს ცხელ ხაზზე (2 98 11 11) სახელმწიფო მიწების პრივატიზაციისა და იჯარასთან დაკავშირიებთ ინფორმაციის მოპოვებას შეეცადა.
„სასოფლო-სამეურნეო დანიშნულების მიწის ნაკვეთების პრივატიზება გასული ზაფხულის შემდეგ დროებით შეჩერებულია სახელმწიფო პოლიტიკიდან გამომდინარე. როდის განახლდება პრივატიზაცია ნამდვილად ვერ გეტყვით. კანონში ცვლილებები უნდა შევიდეს“, - განუცხადა www.eugeorgia.info-ს სააგენტოს ცხელი ხაზის ოპერატორმა ლიკამ.
www.eugeorgia.info-მ მოწოდებული ინფორმაციის სააგენტოს პრესსამსახურთან გადაამოწმა. სატელეფონო საუბარში დაადასტურეს, რომ სახელმწიფო მიწების პრივატიზაცია შეჩერებულია, კანონში ცვლილებები კი ეკონომიკისა და იუსტიციის სამინისტროს ზედამხედველობით იგეგმება. მოგვიანებით გამოგზავნილ წერილობით პასუხში კი სახელმწიფო ქონების ეროვნულმა სააგენტომ უარყო მიწის პრივატიზაციასთან დაკავშირებული მორატორიუმის არსებობა.
„სასოფლო–სამეურნეო დანიშნულების მიწის ნაკვეთების პრივატიზება წარმოადგენს სახელმწიფო ქონების ეროვნული სააგენტოს დისკრეციულ უფლებამოსილებას. სახელმწიფო ქონების ეროვნული სააგენტო 2012 წლიდან დღემდე ახორციელებს სასოფლო–სამეურნეო დანიშნულების მიწის ნაკვეთების პრივატიზებას“, - ვკითხულობთ სააგენტოს მიერ გამოგზავნილ წერილში.
მიწის პრივატიზებისა და იჯარის შესახებ სახელმწიფო ქონების ეროვნული სააგენტოს მიერ მოწოდებლი სტატისტიკა 2012 წლიდან დღემდე პერიოდს ეხება, თუმცა მხოლოდ 2013-2014 წლების სტატისტიკაა ცალკე გამოყოფილი. შესაბამისად, მიმდინარე წლის პრივატიზაციის შემთხვევების დათვლა შეუძლებელია.
სახელმწიფო ქონების ეროვნულმა სააგენტომ ურთიერთგამომრიცხავი პასუხი გასცა „მ.ბლოკ კომპანია“- ს დირექტორ დავით კომლაძის შემთხვასთან დაკავშირებულ შეკითხვას. თავდაპირველად, სააგენტომ არ დაადასტურა კომლაძის მიერ იჯარით აღებულ ნავეთზე სახელმწიფო უწყებების მიერ გზის თვითნებურად გაყვანის ფაქტი: „თქვენ მიერ მოყვანილი გარემოება იმის შესახებ, რომ აღნიშნულ მიწაზე სახელმწიფოს მიერ განხორციელდა გზის გაყვანა სააგენტოს მიერ გადამოწმებული ინფორმაციით არ დასტურდება“.
იმავე წერილში სააგენტო გზის გაყვანის ფაქტს აღიარებს და გზის გაყვანის შემდეგ დარჩენილი ტერიტორიის თავიდან აუქციონზე გატანას სთავაზობს: „ვინაიდან, მხარეებს შორის არსებობს მოქმედი/ძალაში შესული საიჯარო ხელშეკრულება და მოქმედი კანონმდებლობა ხელშეკრულების გაუქმებამდე საიჯარო ქირის ოდენობის შემცირების უფლებამოსილებას არ ანიჭებს ქონების მმართველს, სააგენტო მოკლებულია შესაძლებლობას შეამციროს საიჯარო ქირა, რომელიც გათვალისწინებულია მოქმედი საიჯარო ხელშეკრულებით. ამ შემთხვევაში, მოიჯარის განცხადების საფუძველზე შესაძლებელია ხელშეკრულების მოშლა და გზის ნაწილის გარეშე დარჩენილი მიწის ნაკვეთების თავიდან გაიჯარება“, - ვკითხულობთ სააგენტოს წერილში.
სახელმწიფო ქონების ეროვნულმა სააგენტომ არ გვიპასუხა რატომ არ იყო ელექტრონულ აუქციონში დაწვრილებით ინფორმაცია მითითებული, რიც გამოც საბოლოო ჯამში გურამ ჯინჭველაძემ მისთვის მიუღებელი პირობებით ხელშეკრულება არ გააფორმა და საგარანტიო თანხა 420 ლარი დაკარგა. სააგენტო სტანდარტული პასუხით შემოიფარგლა, რომელიც ისედაც ყველასათვის ცნობილი იყო:
„ვინაიდან, დაინტერესებული პირის მიერ კანონმდებლობით დადგენილ ვადაში არ განხორციელდა შესაბამისი ხელშეკრულების გაფორმება საქართველოს ეკონომიკისა და მდგრადი განვითარების მინისტრის ,,სახელმწიფო ქონების განკარგვისას და სარგებლობის უფლებით გადაცემისას ელექტრონული აუქციონის ჩატარების წესის დამტკიცების შესახებ“ 2011 წლის 10 თებერვლის №1-1/172 ბრძანების მე-4 მუხლის 93 პუნქტის ,,ა“ ქვეპუნქტის თანახმად გაუქმდა ზემოაღნიშნული ელექტრონული აუქციონის შედეგი“, - გვიპასუხეს სააგენტოდან.
www.eugeorgia.info გთავაზობთ სახელმწიფო ქონების ეროვნული სააგენტოს მოწოდებულ ოფიციალურ სტატისტიკას სასოფლო-სამეურნეო დანიშნულები მიწის პრივაზიტაციისა და იჯარასთან დაკავშირებით:
„2012 წლის ოქტომბრიდან დღემდე სააგენტოს მიერ გამოცხადებული იქნა 25 აუქციონი სასოფლო სამეურნეო დანიშნულების მიწის ნაკვეთების პრივატიზებაზე და 580 აუქციონი იჯარით გაცემაზე, ხოლო საქართველოს მთავრობის განკარგულების საფუძველზე პირდაპირი მიყიდვის ფორმით გასხვისდა 58 ერთეული მიწის ნაკვეთი – ჯამში 987. 138 ჰა.
2013–2014 წლების სტატისტიკა შემდეგია:
2013 წელს გორის რაიონში გაიყიდა 25 ერთეული მიწის ნაკვეთი ჯამში 97.367 ჰა.
2014 წელს აბაშაში აუქციონის ფორმით გასხვისდა 30 ერთეული მიწის ნაკვეთი ჯამში 235.704 ჰა.
ჯამურად 2013–2014 წლებში გასხვისდა 55 ერთეული მიწის ნაკვეთი ფართით – 334.071 ჰა“.
იმის მიუხედავად, რომ სახელმწიფო საკუთრებაში არსებული სასოფლო-სამეურნეო მიწის პრივატიზებასთან დაკავშირებით სახელმწიფო ქონების სააგენტოდან უთიერთაგამომრიცხავი ინფორმაცია ვრცელდება, იჯარის შესახებ უტყუარი ინფორმაცია არსებობს. კერძოდ, იჯარის ვადები 5-დან 15 წლამდე მერყეობს. ცალკეულ შემთხვევაში კი იჯარის ვადა არა უმეტეს 49 წლამდე ვადით ხანგრძლივდება.
„სასოფლო-სამეურნეო დანიშნულების სახელმწიფო ქონების ელექტრონული აუქციონის ფორმით პრივატიზებისას, სარგებლობაში გადაცემისა და მართვის უფლებით გადაცემის დროს საწყისი საპრივატიზებო/სარგებლობაში გადაცემის საფასური დგინდება საქართველოს მთავრობის დადგენილების შესაბამისად. გამონაკლისს წარმოადგენს სახელმწიფო საკუთრებაში არსებული სახნავი და სათიბი კატეგორიის მიწის ნაკვეთებზე საიჯარო ქირის ოდენობის საკითხი, რომლის დადგენა მოქმედი კანონმდებლობით ხორციელდება ყოველ კონკრეტულ შემთხვევაში დამოუკიდებელი ექსპერტის აუდიტორული დასკვნის გათვალისწინებით.
არასასოფლო-სამეურნეო დანიშნულების მიწის/უძრავი ქონების შემთხვევაში დამოუკიდებელი ექსპერტის აუდიტორული დასკვნის საფუძველზე გამოიცემა სააგენტოს უფლებამოსილი პირის (ინდივიდუალური ადმინისტრაციული სამართლებრივი აქტით) ბრძანება საწყის საპრივატიზებო საფასურის განსაზღვრის შესახებ“, - აღნიშნულია სახელმწიფო ქონების მართვის სააგენტოს წერილში.
ზურაბ მოდებაძე