დაზღვევის ზედამხედველობის სამსახურს სადაზღვევო კომპანიები დააფინანსებენ
დაზღვევის შესახებ ახალი კანონპროექტის თანახმად, რომელიც პარლამენტს განსახილველად უკვე წარედგინა, დაზღვევის სახელმწიფო ზედამხედველობის სამსახურს სახელმწიფო ბიუჯეტის მაგივრად სადაზღვევო ინდუსტრია დააფინანსებს. გარდა ამისა, პარლამენტისთვის შეთავაზებული ახალი ცვლილებების თანახმად, ყველა სადაზღვევო კომპანია აუცილებლად სააქციო საზოგადოება უნდა იყოს.
პროექტის თანახმად, თითოეულმა სადაზღვევო კომპანიამ საზედამხედველო სამსახურს 50 000-დან 300 000-მდე ლარი უნდა გადაუხადოს.
"ჯიპიაი ჰოლდინგის" საზოგადოებასთან ურთიერთობის დეპარტამენტის ხელმძღვანელი თინა სტამბოლიშვილი აცხადებს, რომ დაზღვევის ზედამხედველობის სახელმწიფო სამსახურის დაფინანსების წესის შეცვლა სადაზღვევო ბაზარზე დიდ გავლენას მოახდენს: "მსგავსი მოდელი ბევრ ევროპულ ქვეყანაში მოქმედებს და ის ზედამხედველს აძლევს სტიმულს, რომ სადაზღვევო ბაზრის განვითარებაზე იყო ორიენტირებული. დარწმუნებული ვართ, რომ ახალი რეგულაცია სწორედ ამ მიმართულებას მისცემს ბიძგს და დაზღვევის ზედამხედველობის სამსახური უფრო თანამედროვე და განვითარებაზე ორიენტირებულ სტრუქტურად ჩამოყალიბდება.
ზედამხედველობის სამსახურის ფუნქცია მხოლოდ სადაზღვევო კომპანიების კონტროლი არ არის (თუმცა, ეს ერთ-ერთი მთავარი ფუნქციაა). მისი მოვალეობა უნდა იყოს ბაზრის განვითარებაზე ზრუნვა, გამოცდილების შექმნა-გაზიარება და სადაზღვევო ბაზარზე მოქმედი კომპანიებისთვის სხვადასხვა სახის ტექნიკური და ინტელექტუალური დახმარების აღმოჩენა.
"ჯიპიაი ჰოლდინგი" მხარს უჭერს ამ ცვლილებას. ჩვენ მზად ვართ, ზედამხედველობის სამსახურის საქმიანობის კიდევ უფრო განვითარებაში საკუთარი წვლილი შევიტანოთ. ვისურვებიდთ, რომ სამეთვალყურეო საბჭოში სადაზღვევო კომპანიებიც იყვნენ წარმოდგენილნი, რათა უფრო მეტად ვიყოთ ინფორმირებულები სამსახურის განვითარების გეგმებისა და მიმდინარე მოვლენების შესახებ. ძალიან მნიშვნელოვანია ის ცვლილებაც, რომელიც ითხოვს რომ სადაზღვევო კომპანიის ორგანიზაციულ-სამართლებრივი ფორმა მხოლოდ სააქციო საზოგადოება იყოს. ეს ხელს შეუწყობს იმას, რომ სადაზღვევო სფეროში მოქმედი კომპანიები იყვნენ უფრო გამჭვირვალე და ანგარიშვალდებული როგორც საკუთარი აქციონერების, ისე თითოეული მომხმარებლის მიმართ. კორპორაციული მმართველობის გაუმჯობესების კუთხით ეს წინ გადადგმული ნაბიჯი იქნება, რადგან საქმე ეხება საფინანსო მომსახურების კომპანიებს და საიმედოობის ხარისხი, ცხადია, ბევრად მაღალი უნდა იყოს, ვიდრე ახლაა, " - ამბობს სტამბოლიშვილი.
„პეესპე დაზღვევის" გენერალური დირექტორი ვლადიმერ ბეჟაშვილი "კომერსანტთან" საუბარში აცხადებს, რომ ახალი კანონპროექტით შემოთავაზებული ცვლილებები ევროკავშირის მოთხოვნაა და მათი განხორციელება დროულია.
ჩვენ გადავამოწმეთ და გავარკვიეთ, რომ ასოცირების შეთანმებაში არ არსებობს დირექტივა, რომელიც საქართველოსგან დაზღვევის ზედამხედველობის სახელმწიფო სამსახურის დაფინანსების წესის შეცვლას მოითხოვს. კანონპროექტის განმარტებით ბარათშიც აღნიშნულია, რომ ზედამხედველობის სამსახურის დაფინანსების წყაროს შეცვლა და საბიუჯეტო ორგანიზაციიდან თვითდაფინანასებაზე გადასვლა მსოფლიო ბანკის და საერთაშორისო სავალუტო ფონდის რეკომენდაციაა. პარლამენტის საფინანსო-საბიუჯეტო კომიტეტში აცხადებენ, რომ ევროკავშირის კანონმდებლობასთან დაახლოების მიზნით შემუშავდა მხოლოდ ის ცვლილება, რომლის თანახმადაც ყველა ის სადაზღვევო კომპანია, რომელიც ამჟამად შეზღუდული პასუხისმგებლობის საზოგადოებაა, 2015 წლის 1 ივლისამდე სააქციო საზოგადოებად უნდა გარდაიქმნას. კანონპროექტის განმარტებით ბარათში აღნიშნულია: "მოცემული ცვლილების არსი უპირველესად მდგომარეობს საქართველო -ევროკავშირს შორის გაფორმებული ასოცირების ხელშეკრულების შესაბამისად მოცემული სადაზღვევო საქმიანობის დაწყებისა და მისი შემდგომი განხორციელების შესახებ (2009/138) ევროპულ დირექტივასთან ჰარმონიზაციის მოთხოვნაში. აღნიშნული პრაქტიკაა მსოფლიოს თითქმის ყველა მოწინავე ქვეყნებში, რაც აიხსნება იმით, რომ ფინანსური სექტორის სტაბილურობისათვის კაპიტალური საზოგადოების ამგვარი რთული ფორმა გაცილებით მეტად არის მისაღები, ამავდროულად იგი იძლევა კონტროლის უკეთეს საშუალებას და ზოგადად მიმართულია კორპორატიული მართვის მკაცრი მოთხოვნების დაკმაყოფილებისაკენ".
თბილისის პოლიტიკის ანალიზის ცენტრის ანალიტიკოსი ვახტანგ ლეჟავა, რომელიც ხელისუფლებაში "ნაციონალური მოძრაობის" ყოფნის დროს პრემიერ-მინისტრის მრჩეველი იყო და ასოცირების შეთანხმების ტექსტზე მუშაობდა, www.eugeorgia.info-სთან საუბარში აცხადებს, რომ ევროკავშირთან ასოცირების შეთანხმება საქართველოსგან არც ზედამხედველობის სახელმწიფო სამსახურის დაფინანსების წყაროს შეცვლას ითხოვს და არც სადაზღვევო კომპანიების სააქციო საზოგადოებად გარდაქმნას. "ასეთი მოთხოვნა არ მახსენდება. ასოცირების შეთანხმების ტექსტი არასოდეს მიუთითებს განსახორციელებელი ცვლილების მეთოდზე, ის მიუთითებს შედეგზე, რომელიც უნდა დადგეს. მაგალითად, შედეგი უნდა იყოს ის, რომ სადაზღვევო კომპანიის მუშაობა იყოს გამჭვირვალე. ასოცირების შეთანხმებაში არსად წერია, რომ ამისთვის სადაზღვევო კომპანია აუცილებლად სააქციო საზოგადოებად უნდა გარდაიქმნას. სადაზღვევო კომპანიებს არ აქვთ ვალდებულება, რომ დაზღვევის სახელმწიფო ზედამხედველობის სამსახური დააფინანსონ. ამ პროცესს აქვს მხოლოდ ერთი შეფასება - კერძო კომპანიები ახდენენ სახელმწიფო ფუნქციის პრივატიზებას. თუ დაზღვევის სახელმწიფო ზედამხედველობის სამსახურის მთავარი მისია არის ის, რომ საზოგადოებრივი სიკეთე დაიცვას, მაშინ ეს სიკეთე დაცული უნდა იყოს გადასახადის გადამხდელთა თანხით. ის, რისი გაკეთებაც ახლა უნდათ, შევარდნაძისდროინდელი მეთოდია - ინდუსტრია დააფინანსებს მათი ინტერესების დამცველ სამსახურს, რომლის თანამშრომლებსაც მარეგულირებელი კომისიების თანამშრომელთა მსგავსად უზარმაზარი ხელფასები ექნებათ და არავის მიმართ არ იქნებიან ანგარიშვალდებულები. ასეთი ვალდებულება რომც გვქონდეს, მისი შესრულება უახლოეს მომავალში სავალდებულო ვერ იქნება. ასოცირების შეთანხმება ჯერ ძალაში არ არის შესული. იმისთვის, რომ ეს შეთანხმება ძალაში შევიდეს, მას ევროკავშირის ყველა ქვეყანამ უნდა მოაწეროს ხელი. ამ პროცესს კიდევ სულ მცირე 1,5 წელი დასჭირდება. ამიტომ, არცერთი ვალდებულება ჯერ ვადადამდგარი არ არის".
ასოცირების შეთანხმებაში აღნიშნულია, რომ 2009 წლის 25 ნოემბრის ევროპარლამენტისა და საბჭოს 2009/138/EC დირექტივის დებულებები სადაზღვევო ბიზნესის დაწყებისა და ფუნქციონირების შესახებ ასოცირების შეთანხმების ძალაში შესვლიდან ექვსი წლის ვადაში უნდა შესრულდეს.
„დაზღვევის შესახებ“ საქართველოს კანონში ცვლილებების შეტანის შესახებ“ კანონპროექტის ავტორი და ინიაციატორი პარლამენტის საფინანსო-საბიუჯეტო კომიტეტის თავმჯდომარე დავით ონოფრიშვილია.
