ქართველ მცირე და საშუალო მეწარმეებს ევროკავშირი 62 მილიონ ევროს გამოუყოფს
ევროკავშირი საქართველოში მცირე და საშუალო ბიზნესის დასახმარებლად ახალ პროგრამას - EU4Business initiative იწყებს, - ამის შესახებ ევროკომისარმა ვაჭრობის საკითხებში, სესილია მალმსტრომმა, დღეს თბილისში ოფიციალური ვიზიტის დროს განაცხადა.
პროგრამის ღირებულება 62 მილიონი ევროა და ის ქართველი მეწარმეების როგორც ტექნიკურ, ასევე ფინანსურ დახმარებას ითვალისწინებს. პროგრამა ხელს შეუწყობს საწარმოების ევროკავშირის სტანდარტებთან მიახლოებას, ფინანსებისა და ბიზნესრჩევების ხელმისაწვდომობას, მთავრობის დახმარებას რეფორმების გატარებაში ვაჭრობასა და კერძო სექტორში, ასევე ბიზნესის მხარდამჭერი ორგანიზაციების გაძლიერებას.
„ქართულ ბიზნესს განვითარების დიდი პოტენციალი აქვს, განსაკუთრებით იმ შესაძლებლობების გათვალისწინებით, რასაც ღრმა და ყოვლის მომცველი თავისუფალი ვაჭრობის შესახებ შეთანხმება სთავაზობს. ეს ხელშეკრულება საქართველოსთვის 500 -მილიონიან ბაზარს ხელმისაწვდომს ხდის. EU4Business აერთიანებს ევროკავშირის ყველა პროგრამას, რაც ევროკავშირის ბაზართან ეკონომიკური ინტეგრაციის პროცესში
საქართველოს დაეხმარება.", - განაცხადა მალმსტრომმა.
პროგრამის ფარგლებში არსებული პროექტებისა და ინიციატივების შესახებ ინფორმაცია განთავსებულია ვებ-გვერდზე - EU4business.ge.
ევროპის კომისარმა ასევე აღნიშნა, რომ საქართველომ თავისუფალი ვაჭრობის ხელშეკრულების იმპლემენტაციის მიმართულებით შესამჩნევი პროგრესი განიცადა.
“ჩვენ უკვე ვნახეთ წარმატების მაგალითები: ქართული მოცვი და კივი დიდი ბრიტანეთისა და გერმანიის სუპერმარკეტებში იყიდება. ეს ქართული პროდუქციის პერსპექტივების პირველი, მაგრამ სტიმულის მომცემი მაგალითია. მთავარი მიღწევაა, რომ მათმა ხარისხმა სურსათზე ევროკავშირის მოთხოვნები დააკმაყოფილა. ეს პროდუქტები მხოლოდ დასაწყისია, მომავალში ექსპორტირების რეალური პოტენციალი გააჩნია სხვა ქართულ პროდუქტებსაც, მათ შორის, თაფლსა და თევზს“, აღნიშნა მალმსტრომმა.
თავისუფალი ვაჭრობის ხელშეკრულება საქართველომ ევროკავშირთან 18 თვის წინ გააფორმა. ევროკავშირი საქართველოს პირველი საექსპორტო დანიშნულების ადგილია და მთლიან ექსპორტში 29% უკავია. გასულ წელს სავაჭრო ბრუნვამ ორ მხარეს შორის 2,5 მილიარდი ევრო შეადგინა.
აღსანიშნავია, რომ 2014-2017 წლებში ევროკავშირი საქართველოს, საერთო ჯამში, 410 მილიონი ევროს ღირებულების საგრანტო დახმარებას გამოუყოფს.
