საქართველოში მყოფ უცხოელებს საიმიგრაციო ვიზის გაგრძელება ქვეყნიდან გასვლის გარეშე შეეძლებათ
მთავრობას "უცხოელთა და მოქალაქეობის არმქონე პირთა სამართლებრივი მდგომარეობის" შესახებ საქართველოს კანონში ცვლილებები შეაქვს. ახალი კანონპროექტი პარლამენტს იუსტიციის მინისტრის მოადგილემ, ალექსანდრე ბარამიძემ წარუდგინა. ბარამიძის განცხადებით, ცვლილებების მთავარი მიზანია „პრაქტიკაში გამოვლენილი იმ ხარვეზების გამოსწორება“, რომლებიც 2014 წლის 1 სექტემბრიდან ამოქმედებულმა ახალმა სავიზო და საიმიგრაციო წესებმა გამოიწვია. პარლამენტმა კანონპროექტი პირველი მოსმენით 12 ნოემბერს მიიღო.
გამკაცრებულმა სავიზო და საიმიგრაციო რეგულაციებმა საქართველოში მყოფ უცხოელებს პრობლემები შეუქმნა. ახალი წესების ამოქმედებამდე მათ საქართველოში უვიზოდ ყოფნა 360 დღის განმავლობაში შეეძლოთ, ახალი წესებით კი ეს დრო 90 დღემდე შემცირდა. ამასთან ერთად, 13 ქვეყნის მოქალაქეებისთვის უვიზო რეჟიმი საერთოდ გაუქმდა. 2014 წლის 1 სექტემბრიდან ამოქმედებული ახალი რეგულაციების შემდეგ საქართველოში კანონიერად მყოფი დაახლოებით 2 000-მდე უცხოელი ქვეყნიდან გაძევების საფრთხის წინაშე აღმოჩნდა.
ახალი კანონპროექტის თანახმად, იმ პირებს, რომლებიც საქართველოში 2014 წლის 17 მარტის შემდეგ შემოვიდნენ და ამ ცვლილების ამოქმედების დროისთვის ისევ ქვეყანაში იქნებიან, 2015 წლის 1 მარტამდე ეძლევათ ვადა იმისთვის, რომ საიმიგრაციო ვიზა ქვეყნიდან გაუსვლელად აიღონ. ამისთვის მათ ვიზის ვადის გასვლამდე 45 დღით ადრე საგარეო საქმეთა სამინისტროს უნდა მიმართონ და მომსახურების ღირებულება - 100 ლარი გადაიხადონ.
ამჟამად, ვიზების აღება, ან გაგრძელება შესაძლებელია მხოლოდ საზღვარგარეთ არსებულ საქართველოს დიპლომატიურ მისიებში, განსაკუთრებულ შემთხვევებში კი სასაზღვრო-გამშვებ პუნქტებზე.
კანონპროექტში შეტანილი ცვლილების მიხედვით, 5-დან 10 დღემდე იზრდება საქართველოში ტრანზიტული მიზნებით უვიზოდ ყოფნის ვადაც. ტრანზიტული ვიზა გაიცემა მხოლოდ იმ შემთხვევაში, თუ მესამე სახელმწიფოში შესვლის მიზნით საქართველოს ტერიტორიის ტრანზიტით გავლისას პირი საქართველოს ტერიტორიაზე 10 დღის განმავლობაში ჩერდება.
კიდევ ერთი სიახლე ეხება თანამემამულის სტატუსის მქონე უცხო ქვეყნის მოქალაქეებს, რომლებსაც შესაძლებლობა ეძლევათ მიიღონ სპეციალური ბინადრობის ნებართვა, რაც, კანონპროექტის განმარტებითი ბარათის თანახმად, შექმნის მათი საქართველოში გრძელვადიანი ყოფნის სამართლებრივ საფუძველს და ხელს შეუწყობს უცხოეთში მცხოვრებ თანამემამულეებს საქართველოსთან კავშირის შენარჩუნებაში.
შეგახსენებთ, 2014 წლის 1 სექტემბერს ამოქმედებული ახალი სავიზო და საიმიგრაციო რეგულაციებით შექმნილი პრობლემების გამო საქართველოში მყოფ უცხოელ მოქალაქეებს ბოდიში პირადად პრემიერ-მინისტრმა ირაკლი ღარიბაშვილმა მოუხადა: „მინდა, ბოდიში მოვუხადო ყველა იმ უცხოელ მოქალაქეს, რომელსაც ახალი სავიზო პოლიტიკის ამოქმედებასთან დაკავშირებით გარკვეული უხერხულობა და პრობლემები შეექმნა. ეს არ არის მიზანმიმართული, ეს არის ჩვეულებრივი მუშა პროცესი და გამოსწორდება ყველა ის ხარვეზი, რომელიც დაფიქსირდება ამ პროცესში. ძალიან მალე გავაკეთებთ ამ ყველაფერს“. ეს განცხადება ღარიბაშვილმა 2014 წლის 8 ოქტომბერს, თბილისში მიგრაციის დეპარტამენტის დროებითი განთავსების ცენტრის გახსნისას გააკეთა.
